Fort St. Pieter

Mestreech 8 mei 2010

Vandaog höbbe veer  ’n beziechtiging vaan Fort St. Pieter op de callepin stoon.

Veer vertrokke um twie oor vanoet “De Bookvink” te voot (neturelik) naor ut Fort zoetot veer op tied aon de roondleijding kôste beginne. Um tot d’r altied luij zien die tot ’t beter wete, waor us gezelsjap al gaw in twie grôppe verdeild, d’r waor eine dee zag ummer op St.Pieter gewoend en gewérrek? te höbbe, dee mie grôpke wel eve de weeg zow wieze, iech zal gein naome numme mèh heer had gét met de Bissjop te make, toen veer ewel aon de boetekant vaan ut dörrep koume woar heer de weeg al gaw kwiet en stoonte veer midde in ’n weij met op de groond kooieflatte en roondum puntdraod. Heer wis ziech wél dr’oet te lölle, veer zôwwe és stadsluij gein riechtingsgeveul höbbe.

Op ’t Fort aongekoume (veer ’t leste neturelik) stoond d’n Hier Prevoas al op us te wachte en kôs d,n toer beginne. Iers woort e stök vaan de rieke historie vaan us sjoen stad oet de deuk gedoon, dit veur deginnege die vaan boete Mestreech koume ,en woorte veer door smal géngskes en euver trépkes naor  oonder en naor bove oonder ’t gans fort door geschleip. Iech môt wél zégge tot iech ’t gewéldig voont wie sjoen tot m’n dees renevasie heet oet gevoerd, chapeau, dit ouch veur Stiechting Vestingstad veur hun beijdrage heijaon. Al gaonde woorte de Stöblépkes ummer obstenaoter en had menier Prevaos de groetste meuijte um bove ’t geawhoor vaan eederein oet te koume en ze in ’t gareel te hawwe. Nao tot veer bove op ’t Fort waore gekoume en inkelle lésse in kenonne, sjeetgeweere en kachelpiepe hadde gekrege voonte veer ’t wél genôg gewees en ging us gedachte miejer oet naor e lékker gleeske beer en gét te smikkelle. Nao d’n hier Provaos bedaank te höbbe veur zien explicasies höbbe veer de weeg trök naor de “Bookvink” in geslage en dees kier zoonder iemes dee us zag wie veer môste loupe, ’t waor sjus of veer noe väöl gawwer thoes waore, méh iech dink tot iech m’ch dat méhr verbeeld höb.

Iech  waor in eder geval wél gelökkig tot veer ut vuur kôste goon opstoke um veur gét te ete te goon zörrege.

Bert